Müğənnilər Sevil və Sevinc Səfərova bacıları “Xəzər” telekanalı ilə yollarını ayırmasından yazıb. Musavat.com xəbər verir ki, onlar pz hisslərini sosial şəbəkədə bölüşüb:

“2 iyun 2014-cü il... Xəzər telekanalında “Hər şey daxil” verilişinin ilk canlı yayımı bizim təqdimatımızda... Dörd il hər səhər sizin bir çoxunuzun evinin sakini olduq. Bir çoxunuz bizi evinizin övladı bilib, dərdimizə şərik oldunuz, sevincimizə, uğurumuza sevindiniz. Biz yıxıldıq, siz əlimizdən tutub ayağa qalxmağı öyrətdiniz. Bizi biz etdiniz, halal qazandığımız çörəyi bizə çox görmədiniz. Ailə kanalında çalışıb, oranın övladı, siması olmaq nə qədər qürurvericidir.

Allah o qapını bizə açdı, ilk addımlarımızı sizinlə başladıq. Qurduğumuz işin təməlini sayənizdə möhkəm etdik. 4 il sonra canlı efirlə vidalaşdıq.

Bunu əlim əsərək, ağlayaraq yazıram. Çünki oranı ailəm bilirəm... Düşünün, valideyn qız övladı böyüdür, sonda verdiyi tərbiyəni, əziyyətini çəkdiyi övladını, başqa ailəyə gəlin verir. Bizi də “Xəzər” böyütdü, başa çatdırdı. İndi isə uğurla bizi müğənni kimi sənətimizi daha böyük zirvəyə qaldırmağa yola salır. Bu xəbərə sevinən də, kədərlənən də olacaq”.